Cerita Rakyat Bugis :: Assalenna Nacakkeleq Riala Lambang Ri Soppeng

Engka naengka siwettu ri Soppeng natemmadeceng pakkalinoangnge nasabaq pada maeloq I makkaq I alena mancaji aqjuareng. Nennia pole toni timo temmaka-makae pitu taung ettana. Deqna gaga wedding pole uwesesae. Akurangenni anre tau Soppeng e iyae kajajaiangi nasabaq pangkaukenna paqbanua e iya deq e napojiwi dewata seuwae.

            Engkana naengka seuwa esso nasipulung matoa ennenge pulona mappasidduppa ada. Bicara I pekkogi naweqding makessing pakkalinoangnge paimeng naweqding pole uwesesae.

            Mattengangiro maqbicara matua ennenge pulona maki nateppa engka cakkelleq silabine meccekkeng ri yaseqna tau maqbicarae patiwi ase siule. Tessiagai ittana nallutuqna cakkeleq ero, namakessing oninna sabanna marolli maccue rialena momponi ri laleng pikiriqna matua ennenge pulona makkedae “cakkeleq ero najellokengngi laleng lao sapaq I tau maeloq e riakka mancaji aqjuareng nassuoranni matua ennenge pulona lao maccueriwi cakkeleqro.

            Pappai bajae lao tongenni tauwe maccueriwi cakkeleq ero. Tegi-tegi naengkalinga moni, kusiro lao passappae. Tessiagai ittana joppa narapini tangasso napoleitoni lupu. Aga nalleppanna mappesau nainappa natimpaq bokonna maeloq manre esso. Ianaro sabaqna nariaseng onrongero Labokong.

            Tessiagai ittana joppa naruntuqni seddie dareq temmaka loanna penno ase maridi maneng, pada –pada ase natiwi e cakkeleq nalellungngero. Naruntuqni seddie tau paqdongina asewero, namakkutanana makkeda , “ Tegi monro punana asewe?” nappabalina makkeda, “deqto namabela pole rionrongewe”. Aga nalaona rionronna tau punnae ase. Narapini ri bola naonroiye punnana ase, nabissaini ajena, natuppu aqdengeng, nalettoi appakappang natudang ritappere maruqdanie nasujuq mappakaraja. Naruntuqni seddie tau manurung mappakeang tudang ri laleng mpola riteqdungi rijoana.

            Purai pada massimanni lao ri Soppeng. Tessiagai ittana mallaleng aga naleppanna mappesau nainappa giling mitai bola napolei nadeqna napaita. Iyanaro sabaqna nariase onrongero sekkenyiliq.

            Ri wettu lettunana ri Soppeng. Matteruni lao rimatoa ennenge pulona mappitangngi ase natiwie nennia nacaritangngi tau naitae rilaonna. Nassediqngini matoa Bila, matoa Botto sibawa matoa Ujung makkedae tau engkae ri Sekkanyiliq tomanurung iaya makessingnge riakka mancaji ajjuareng. Aga napada samaturuni matoa ennenge pulona maeloq lao rionronna tomanurungngero . Aga napada nakkarenni ale lao rionrongngero.

            Lettuqna ri bolana tomanurunge, nabissaini ajena , nainappa natuppu aqdeneng, nalettoi appakappang nalao tudang ri tappere maruddanie, sujuq mappakaraja lao ri Tomanurungnge nainappa makkeda “ Iyanamai kiengkang lamarupeq maeloqki muamaseang naajaqna muallajang naikona ripopuang. Mudongiri temmatipa, musalipuri temmadingi, muwessei temmakapa. Ikona mpawakeng rimae rimabela. Namauna anmmeng napattarommeng muteyai kiteyatoi.”

            Makkedatopi tomanurunge ri Sekkanyiliq, “ engka topa upoadakko mennang. Engkatopa sapposisekku manurung ri Libureng. Madecekko mulao malai muakkarengi ale iko tau Soppeng e kidua sapparekko deceng mennang. Naiyaro mupodatu ri Soppeng Rilau, naiyaqna mupodatu ri Soppeng Riaja. Mupasituru tangnga mulao malai. Purairo laoni matua ennenge pulona ri Lebureng kua riyasenge Manurunge ri Goarie. Napoleini Manurunge tudang ri balubu naqdepparie.

            Makkedai matua Bila, matua Ujung, sibawa matua Botto, “Iya kiengkang lamarupeq maeloqki muammaseang naajaqna muallajang naikona kipopuang, mudongiri temmatipa, masalipuri temmadingi, muwessei temmakapa. Naikona mpawaken ri mae ri mabela. Namau anmmeng nappattarimmeng muteyai kiteyatoi.

            Makkedani manurunge ri Goarie, “temmaqbelle areqga, teddua nawa-nawaga, aga nassitarimanna adae. Iayanaro riaseng akkulu adangenna to Soppeng napuata lettuq ri torimonrinna tau Soppeng e.

            Iyanaro assabarenna na cakkelleq riala lambang ri Soppeng nasabaq iya pitakki laleng asalamakeng riwettu temmadecenna pakkalinoangnge nennia riwettu tempeqdinna pole uwesesae.