Datu Luwu La Bustana Datu Maongge iyana arung ri Luwu
marissengeng namakessing ampena iyaro essoe masara ati. Iyaro eleqe silelona
pura tarima kareba pole ri passurona arung Bone makkeda riassuroi anaq makkunrainna
ya magelloe, anaq dara Tadampalik asenna. Masarani arung Luwu. Narekko natarimai nakennai abala nasaba
iyaro adeqna to Luwue deq naweddingngi narekko botting sibawa tau risaliweng
Luwu. Naekiya narekko natolaqi nakkitaurangngi iyaro kerajaang Bone ya malessie
newai tana Luwu sarekkuammengngi namasessai tau rikampongngero. Purana
napikkiri madeceng, napattentuni lo natarimai passurona arung ri Bone. Lisuniro
passurona arung ri Bone podangngi iyae
kareba madecengnge.
Dena siaga essona puranaro, malasai anaq dara Tadampalik.
Iyaro lasana makalallaing apaq iyaro ulina ya mapute nenniya melenyue tappa nakennameni lasa masala uli iyae na
tenrisenge baunna. Siagani tau pura murai naekiya degage mattujung. Nakketorengngi narekko iyaro lasana anaqna lebbai ri selessurenna
iyarega tau ri kamponna. Arung Luwu temmaka nasesseqna alena palaoi anaqna
messu pole ri tana Luwu. Diebburenni rakiq maloppo, nappa natiwini iyaro arung
masala ulie ri accuerini ri passurona arunge massibawa pengenruanna.
Ri essoe ya purae ripattentue, arung ri Luwu narenni anaqna
kawali nappa narenni ada matedde. Ripaliniro lao ri saloe namassibabbuani tau
rikampongero. Siangngesso labeq’e, naruntuqniq sedie onrong iya malappae
naikiya magelloe. Riebburanni onrong accinongeng nainappa mattaneng. Naiyaro ri
kampongnge maega diruntu batang Wajo jaji iyaro kampongnge riasengni Wajo naiya
anaq dara Tadampalik ritellani anaq dara Wajo.
Engka
seuwa essona, wettunna arung masala ulie
tuda tudang, engka muna tedong mpuleng luruiwi nainappa rilepeq ulina.
Riwettu rilepeqni magello nasedding ulina. Gangkannaro, esso-essoni engka iyaro
tedongnge gangkanna ulina arung masala ulie marakko na sau. Mapute na malenyu
tona. Sukkuruni arung masala ulie ri puang Allahu Taala apaq iyaro tedongnge napasau
ulina arung makkunraiyero. Tanrang assukkurukenna, arung makkunraiyero
naccangngi riganggu iyaro tedong mpulengnge.
Engka seuwa wettu anaqna Arung Bone laoi ri aleqe sappa
olokolo naekiya massarangngi ri pasukanna, namabela toni tama rilalenna aleqe, jaji
dena naissengngi tega lo nalokkai. Dena maitta engka naita caya lampu mallua
pole mabela. Naparentani jongana lao ri onrong engkae caya lampu. Iyaro
onrongnge onronna anaq dara Tadampalik, jaji ritiwini mengolo ri arung
makkunraiyero. Iyaro anaqna Arung Bone napujiwi arung makkunraiyero apaq
magello laddeq rita. Naekiya deq naissengngi narekko purani ripasi taro sibawa
iyaro arunge.
Siangngesso purana monro ri onronna arung makkunraiyero,
loni paimeng lisu ri kamponna ri Bone. Napalettuqni akkattana lo napubinewi/.
Singngesso puranaro engkani paimeng iyaro anaqna arung bone lo nassuroi anaq
dara Tadampalik. Iyaro anaq dara Tadampalik narenni anaqna Arung Bone kawali
purae riereng ri arung Luwu, nakkeda palettukanni iyae kawalie ri arung Luwu
narekko natarima madecengngi iyae kawalie, sarekkuammengi natarimamo passurona
anaqna arung Bone.
Laoni mangolo ri arung Luwu nappa napalettukenni akkatta
madecengna lo nassuroi arung makkunrainna Datu Luwu. Marennuniro arung Luwu
apaq sauni anaq makkunrainna. Iyaro bettuanna ritarimamoi akkatta madecengna ri
puang Allahu Taala. Ritarimaniro passurona anaqna arung ri bone ri arung luwu.
Siminggu puranaro jajini acara bottingna arung makkunrainna Luwu sibawa anaq
arung Bone. Iyaro pangerang Bone natiwini binena ri Bone nappa tuo mammase
mase ri tana Bone.
0 komentar:
Posting Komentar