CERITA RAKYAT MAKASSAR : TAU DORAKAYA RI TAU TOANA

Ri sekrea kampong  ammantangi  sekrea tukkalabini. Siapa arei sallona akballak-ballak ri kamponga anjo anggap tommi sitau anak burakne. Ri wattu anngumuruknamo anakna tuju taung appakarammula tommi napasikola anjo anakna. Tammaki napannarrusuki sikolana mange ri butta Jawa. Attaung-taungi assikola sanggenna tammak tommi ri sikola tinggia, akbaine tommi anak radeng. Niakmo sekre wattu na nikutaknang ri bainenna angkana, ” Kerei mae ammantang tau toanu?”

Appiwalimi anjo lapong tau angkana, ”Tau toaku mate ngasengmi rua-rua.”

Anne lapong anak tinggi sikalimi pangkakna ri pammarenta kalumanyang tommi nasabak jaimi barang-barangnna. Niak oto cakdina, niak oto lompona, jai tongi pole barang-barang maraenna, sanggenna nigallarak tukalumannyanna anjo kamponga siagang tumalompona anjo kamponga.

Na anjo tau toana ia rua nakkuk tommi nasakring nasabak siapami sallona, attaung-taummi tassicinik anakna, taena tong nalanngeek kareba. Apaji na niakmo sekre wakttu na nakunjungi mange natoak anakna, battuang angkana kalauki ri butta Jawa lanngagangi sicinik anakna. Battue angjoren ri tampak pammantanganna anakna akkutaknangmi ri pambantuna angkana, ”Anrini kutaeng ammantang anjo nikanaya Pak Ahamak?”  Nakanamo pambantuna, ”Iyek anrinni.”

Nakana seng tau toana, ”Pauang sai bedeng I lalang angkana niaki ammatta siangang manggeta erok anngagangkik sicinik.”

Apaji namaemok nipauang. Battue antama nipauang tommi manuruk p anjo tau toana. nakanamo anjo Pak Ahamak ri  pambantuna, ”Pauangi anjo taua I pantarak angkana tenamo nakke manggeku tena tommo ammakku, sallo ngasemmi matena.”

Jari, assulukmi nipauang, nakana, ”Lekbakmi kupauang, mingka nakana anjo Pak Ahamak sallomi matena ammakna kammaya tompa pole manggena.” Nakana seng anjo lapong tau toa, ”Manna mo anjo nakamma mamo, sungkemi pakkekbuknu nakusicinik rolo.”

Antamai seng nipauang angkana,  ”Erok dudukik naagang sicinik anjo tau toana I pantarak.”

Nakanamo ri pambantuna angkana, “Tena, tena naparallu antama mae, nasabak taenamo nakke manggeku taenamo ammakku.”

Sanggena pinruang pintallungi nisuro aklampa anjo tau toaya. Na anjo lapong tau toa ammantang tonjia i pantaranna anjo pakkekbuk kamponna na napiondangi konkong lompona anjo pajaga kamponna anngarruk ia rua. Anjo Pak Ahamak sirik-siriki kutaeng ri bainenna nasabak lekbak napaui angkana taenamo manggena, tenamo manggena. Apaji na nalappassammo konkong lompona anjo pajaga kamponna na konkong, lokok-lokokmi ia rua, sanggenna sallang mate ngaseng.

Ri bokoanganna anjo pakbakasakna Allahu Taala ri ia, battuang ri anjo anakna pilak allo pilak allo pilak naung tommi pakbarang-barangna, garring-garring tommi, nipanaung tommi pole pangkakna ri pammarenta nasabak malanggarakna paraatorang. Nasabak taenanmo pakbarang-baranna, ri tuli garrinna, apaji nakburaknemo pole bainenna, battuang kana nipelaki ri bainenna. Kammami anjo pakbalasakna karaenga Allahu Taala ri tau dorakaya ri tau taona.